ఇండోనేషియాలో భారీ భూకంపం

జకార్తా, పడాంగ్‌: పశ్చిమ ఇండోనేషియాను భారీ భూకంపం వణికించింది. భూకంప లేఖినిపై 7.9 తీవ్రతతో వచ్చిన ప్రకంపనలు ఇక్కడి ప్రజలకు కంటిపై కునుకులేకుండా చేశాయి. పలు ప్రాంతాల్లో సునామీ సైతం వచ్చే అవకాశముందని మొదట అధికారులు హెచ్చరికలు జారీ చేశారు. కానీ కొన్ని గంటల తర్వాత అలాంటి ముప్పేమీలేదని వారు స్పష్టంచేశారు. 2004లో హిందూ మహాసముద్రంలో చెలరేగిన భారీ సునామీ ఈ ప్రాంతాన్ని అతలాకుతలం చేసిన సంగతి తెలిసిందే. అమెరికా భూవిజ్ఞాన అధ్యయన విభాగం(యూఎస్‌జీఎస్‌) సమాచారం ప్రకారం.. సుమత్రా దీవుల పశ్చిమ తీరంలో బుధవారం సాయంత్రం 6.50 గంటలకు (స్థానిక కాలమానం ప్రకారం) భారీ ప్రకంపనలు వచ్చాయి. పడాంగ్‌కు నైరుతి దిశగా 808 కి.మీ. దూరంలో 24 కి.మీ. లోతు నుంచి ఈ ప్రకంపనలు విరుచుకుపడ్డాయి. ఇక్కడకు వందల కి.మీ. దూరంలోనే మెంటావై దీవులున్నాయి. వీటిలో ఎలాంటి నష్టమూ సంభవించినట్లు వార్తలు రాలేదని ఇండోనేషియా గాలింపు, సంరక్షణ సంస్థ(ఐఎస్‌ఆర్‌ఏ) అధిపతి బాంబాంగ్‌ సోయెలిస్టో తెలిపారు. తక్కువ లోతునుంచి ప్రకంపనలు రావడంతో నష్టం జరిగే అవకాశమున్నట్లు నిపుణులు అంచనా వేశారు.
పడాంగ్‌పై ప్రభావం: పశ్చిమ సుమత్రాలోని ప్రధాన నగరం పడాంగ్‌లో భారీగా ప్రకంపనలు వచ్చాయి. ఇక్కడి ప్రజలు ఇళ్లలో నుంచి బయటకు పరుగులు తీశారు. ద్విచక్ర వాహనాలు, కార్లపై ఎత్తులో ఉన్న ప్రాంతాలకు ఆఘమేఘాలపై చేరుకున్నారు. కొన్ని గంటలపాటు పశ్చిమ, ఉత్తర సుమత్రా, యాసెహ్‌, బెంగ్‌కులు, లాంపుంగ్‌ ప్రాంతాల్లో సునామీ వచ్చే అవకాశముందని భూకంప పర్యవేక్షణ సంస్థ బీఎంకేజీ హెచ్చరికలు కూడా జారీచేసింది.
అధ్యక్షుడు క్షేమం: భూకంపం వచ్చిన సమయంలో దేశ అధ్యక్షుడు జోకో విడోడో.. ఉత్తర సుమత్రా మెడాన్‌లోని ఓ హోటల్‌లో ఉన్నారని అధికారులు వెల్లడించారు. ఆయన క్షేమంగానే ఉన్నట్లు వారు తెలిపారు. భూకంప ప్రభావం తమ పరిసరాల్లో అంతగాలేదని మెడాన్‌నివాసి ఒకరు కూడా వివరించారు. ఇండోనేషియా పొరుగు దేశమైన ఆస్ట్రేలియా సైతం సునామీపై అప్రమత్తమైంది. తమ పశ్చిమ తీరంలోని కొన్ని ప్రాంతాలకు హెచ్చరికలు జారీచేసింది. మరోవైపు పాకిస్థాన్‌లో సైతం బుధవారం 5తీవ్రతతో భూకంపం సంభవించింది. స్థానిక కాలమానం ప్రకారం మ. 12 గంటలకు ప్రకంపనలు వచ్చినట్లు భారత వాతావరణ అధ్యయన విభాగం (ఐఎండీ) వెల్లడించింది.

When you Call., Don't forget to mention that you found this "ADVERTISEMENT or LATEST NEWS" on FreshDeals365.Com....I wish to be contacted by shop owners or telemarketers of any other website...TQ visit again for "DAILY DEALS and UPDATES"....For more Call::9966392211.