భాగ్యనగరంలో బైక్‌ట్యాక్సీలు!

స్త్రీల కోసం మహిళా చోదకులు 
మార్చిలో రోడ్లెక్కేందుకు ఏర్పాట్లు చేస్తున్న ‘గెట్‌ మి’ 
హైదరాబాద్‌: హైదరాబాద్‌కు ద్విచక్ర వాహన ట్యాక్సీలు వచ్చేస్తున్నాయి. ప్రపంచంలో ట్రాఫిక్‌ రద్దీ ఎక్కువగా ఉండే జకార్తాతోపాటు మన దేశంలోని దిల్లీ, ముంబయి నగరాల్లో ఉన్న ‘టూవీలర్‌ ట్యాక్సీ’లు ఇప్పుడు భాగ్యనగరంలోనూ కొలువుదీరనున్నాయి. ట్రాఫిక్‌ రద్దీ వల్ల బస్టాపుల్లో, రైల్వేస్టేషన్లలో గంటల తరబడి చిక్కుకుపోయే ప్రయాణికులే ఈ ట్యాక్సీల లక్ష్యం. నాలుగు చక్రాలున్న ట్యాక్సీలో వెళితే రెండు గంటలు, బైక్‌లో అయితే గంట అనేది నినాదం. అలా తక్కువ ఛార్జీలతోనే ప్రభుత్వ అనుమతి తీసుకొని మార్చి నెలలో సేవల్ని ప్రారంభిస్తామంటోన్న ‘బైక్‌ ట్యాక్సీ’ విశేషాలు తెలుసుకుందాం..

హైదరాబాద్‌లో రోజూ 35లక్షల మంది ఆర్టీసీ బస్సుల్లో, లక్షన్నర మంది ఎంఎంటీఎస్‌ రైళ్లలో గమ్యస్థానాలకు వెళుతుంటారు. ఈ క్రమంలో కార్యాలయాల పనివేళల్లో గంటల తరబడి రోడ్లపై చిక్కుకుపోయే ప్రయాణికుల పరిస్థితి వర్ణనాతీతం. అలాంటి సాధారణ, మధ్యతరగతి ప్రయాణికులను వినియోగదారులుగా మార్చుకునేందుకు ఐటీ ఉద్యోగులు సిద్ధమయ్యారు. బైక్‌ట్యాక్సీల విధానం విజయవంతంగా నడుస్తోన్న జకార్తా, దిల్లీ నగరాలను పరిశీలించిన బృందం.. హైదరాబాద్‌లో ‘గెట్‌ మి’ పేరుతో అంకుర పరిశ్రమను ప్రారంభించింది. బైక్‌ట్యాక్సీలు నడుస్తున్న ఏ నగరంలోనూ లేనివిధంగా ఇక్కడ మహిళల కోసం మహిళా రైడర్లనూ సిద్ధం చేస్తున్నామని ‘గెట్‌ మి’ సహ వ్యవస్థాపకురాలు శ్రావ్యరెడ్డి చెబుతున్నారు. ‘‘గచ్చిబౌలిలోని ఓ ఐటీ కంపెనీలో పనిచేసేదాన్ని. సికింద్రాబాద్‌ నుంచి కారులో కార్యాలయానికి వెళ్లేందుకు ట్రాఫిక్‌ వల్ల రోజూ గంటన్నర పట్టేది. కానీ, ఓ రోజు స్నేహితురాలి బైక్‌లో వెళితే 40 నిమిషాల్లో చేరుకున్నా. సగం సమయం ఆదా అయింది’’ అంటూ బైక్‌ట్యాక్సీ అంకురానికి కారణం చెప్పారు శ్రావ్యరెడ్డి. ‘‘క్యాబ్‌ బుక్‌ చేసుకున్నా ట్రాఫిక్‌ రద్దీ ఎక్కువగా ఉండే సమయంలో ద్విచక్రవాహనమే మిన్న. రద్దీలో చిక్కుకొని ఇంటర్వ్యూలకు హాజరుకాలేకపోవడం, అవసరమైన బస్సులు రాక గంటల తరబడి రోడ్లపై పడిగాపులు కాయడం వంటి కష్టాలకు చెక్‌ చెబుతాం’’ అంటున్నారు మరో సహ వ్యవస్థాపకుడు యశ్వంత్‌.

* ప్రస్తుతం 50 ద్విచక్ర వాహనాలతో 123 మంది రైడర్లను ‘గెట్‌ మి’ సిద్ధం చేసింది. ఏడాదిలో 1,500 వాహనాలను నడపాలనేది సంస్థ లక్ష్యం. తెలంగాణ రాష్ట్ర రవాణా సంస్థ నుంచి అనుమతి రాగానే మార్చిలో సేవలు ప్రారంభిస్తామని యాజమాన్యం చెబుతోంది. రైడర్లకు, ప్రయాణికులకు ఈ సంస్థ వేర్వేరు మొబైల్‌ అప్లికేషన్లను తయారుచేసింది. వాహనం ఎక్కించుకున్న ప్రయాణికుడి వివరాలతోపాటు, వాహన వేగం, వెళుతున్న మార్గం, దూరం, రవాణా ఛార్జి ఎప్పటికప్పుడు ప్రయాణికుడికి, పర్యవేక్షణ విభాగానికి చేరుతాయి. ఛార్జీలు ఎంత వసూలు చేయాలనే విషయాన్ని మాత్రం సంస్థ ఇంకా ఖరారు చేయలేదు. 

---

‘‘బస్టాపుల్లో వేచిచూసే వారిలో మహిళలే ఎక్కువ. పురుషులు నడిపే వాహనాలను వారు ఆదరించరు. అందుకే 31 మంది మహిళా రైడర్లను తీసుకున్నాం. ఉదయం 8 నుంచి రాత్రి 8 గంటల వరకే పనిచేయాల్సి ఉంటుంది. వాహన ప్రమాదాలు తలెత్తినప్పుడు మూడో వ్యక్తి(థర్డ్‌పార్టీ)తో పాటు వాహనం నడిపే వ్యక్తికి, ప్రయాణికుడికి బీమా ఉంటుంది’’

When you Call., Don't forget to mention that you found this "ADVERTISEMENT or LATEST NEWS" on FRESHDEALS365.COM....I wish to be contacted by shop owners or telemarketers of any other website...TQ visit again for "DAILY DEALS and UPDATES"....For more Call::9966392211.